Unha de cociña ( mouse de turrón á mandarina)

Antes de nada, dende o Cee A Barcia, queremos desexarvos un feliz ano para todos aqueles que nos acompañades e nos seguides tan asiduamente. Esperamos que este ano veña cargado de cousas boas e que sigades a compartir con nós todas as nosas experiencias. 

 Todavía nos quedan cousas estupendas do ano pasado por contarvos. Despois de recibir ós Reis Magos, tivemos unha sorpresa no comedor. Temos a sorte de contar cun estupendo equipo de cociña que ademáis de alimentarnos moi ben, mímanos moito como así o demostrou coa comida do último día antes das vacacións de Nadal. Tratábase dun menú sorpresa, composto por un coctel de marisco e un xarrete estofado con guarnición de verduriñas. Todo estaba tan ben presentado e con tanto cariño que nos puxemos moi contentos. Foi todo un agasallo.

O noso equipo de cociña

Coctel de marisco

Xarrete con verduriñas

 Tamén tivemos un postre moi especial. Tratouse dunha mouse de turrón á mandarina que tivo moitísimo éxito. Ímosvos a deixar a receita porque aínda que xa pasou o Nadal, seguro que tedes algunha tableta de turrón que vos sobrou e non sabedes que facer con ela. Seguro que triunfaredes.

MOUSE DE TURRÓN Á MANDARINA

Ingredientes:

-700 ml de nata líquida

-300 gr. de turrón brando

-1 vaso de leite

-100 gr. de améndoas crocantes

Para a xuliana de mandarina confitada:

-1 mandarina

-2 culleradas de auga

- 2 culleradas de aceite de xirasol

-4 culleradas de azúcre

Preparación da xuliana:  

Cortar a monda da mandarina moi fina. Colocar todos os ingredientes nunha tixola. Deixar a lume baixo uns 30 minutos. Escorrer a monda para un coador e separar ben. Arrefriar.

 Preparación da mouse:

-Quentar o leite e disolver nel o turrón. Triturar.

 

-Deixar arrefriar esta mestura .

-Montar a nata engadíndolle o zume de media mandarina. 

-Mesturar a mandarina coa crema (mouse) de turrón con movementos envolventes.

-Encher copas ou cuncas e deixar na nevera unhas horas.

-No momento de servir engadirlle o crocante de améndoas  e a xuliana de mandarina confitada.

Esperamos que vos guste. Bo proveito!